सुदीप सुवेदी
स्याङ्जा , असार १५
जिल्ला प्रशासन कार्यालय स्याङ्जाले असार २५ सम्म निषेधाज्ञाको म्याद थप गरेको छ । नयाँ भेरियन्ट सहित कोभिड १९ को सक्रमितको संख्या विद्यमान रहेको भन्दै निषेधाज्ञाको म्याद थपिएको हो । ‘सक्रिय संक्रमितको संख्या दिन प्रतिदिन घट्दै गएको भएपनि चेन ब्रेक नभएको कारण थप १० दिनको लागि निषेधाज्ञा थप गरेका छौँ ’,प्रजिअ नेपालले बताए ।
दोस्रो चरणको भेरिएन्ट सहितको कोरोना संक्रमण भएसँगै स्याङ्जामा बैशाख २१ गतदेखि निषेधाज्ञा शुरु गरिएको थियो । जारी निषेधाज्ञा अवधीभर अनावश्यक हिँडडुलमा रोक लगाइएको भएपनि अत्यावश्यक पसल , बित्तिय संघसंस्था लगाएतका क्षेत्रलाई खुकुलो बनाइएको छ । पसलहरु बिहान ५ बजेदेखि साँझ ६ बजेसम्म मात्रै खुल्ला राख्न पाईने छ । विवाह ब्रतबन्ध जस्ता कार्यमा बढीमा १५ जनामात्र स्वास्थ्यको मापदण्ड अपनाएर सहभागी हुने पाईने छ भने नीजि तथा सार्वजनिक सवारी साधनमा जोर बिजोर लागू गरिएको छ ।
स्याङ्जामा कोरोना संक्रमण पूर्ण रुपमा अन्त्य नभएको कारण निषेधाज्ञा थपिएको प्रशासनले जनाएको छ । दोस्रो लहरको कोरोना संक्रैमित भई हालसम्म जिल्लामा ९६ जनाको मृत्यु भएको छ भने ३ हजार २ सय ४६ संक्रमित भएका थिए जसमध्ये दुई सय ३२ सक्रिय संक्रमित रहेका छन् ।
