खगेन्द्र पराजुली,
नवलपुर माघ २३
पालिका सदरमुकाम नजिक रहेको एकमात्र बैंकमा धाउनुपर्दा असहज भएपछि बुलिङटार गाउँपालिकाले वडाबाटै सामाजिक सुरक्षा भत्ता उपलब्ध गराउने भएको छ ।
पहिलोपटक वडा नं. ५ बाट सुरुवात गरेको भत्ता वितरण कार्यलाई सवै वडामा विस्तार गरिने लक्ष्य रहेको गाउँपालिका अध्यक्ष दिपेन्द्र सुनारी मगरले बताए ।
गत विहिवार सामाजिक भत्ता बुझ्न बोझा पोखरी, ववकदेखि बुलिङटार गाउँपालिकाको कार्यालय नजिकै रहेको बैंकमा पुगेका बृद्ध–बृद्धाको भीड थियो । टाढाको बाटो, अप्ठ्यारो बाटो, यातायातको सहज सुविधा नहुँदा ज्येष्ठ तथा असक्तहरुलाई भत्ता वुझ्न पालिका केन्द्रसम्म पुग्न पनि असहज भएको थियो । बिहानै बैंक पुगेका उनीहरु दिउँसो अवेरसम्म बस्दा पनि पालो नपाएपछि निराश हुँदै फर्किका थिए ।
