राजस्व संकलनमा सुधार

असार महिनामा अहिलेसम्म सरकारले ६३ अर्ब रुपैयाँ राजस्व संकलन गरेको छ । असार १ देखि २३ गतेसम्म ६३ अर्ब १५ करोड रुपैयाँ राजस्व संकलन भएको महालेखा नियन्त्रक कार्यालयले जनाएको छ ।

असार १ गते सम्म ६ खर्ब ४९ अर्ब रुपैंयाँ राजस्व संकलन भएकोमा त्यसयता मंगलबारसम्म ७ खर्ब १२ अर्ब रुपैयाँ पुगेको छ । असार महिनामा राजस्व संकलन केही सुधार भएपनि चैत, वैशाख र जेठमा सरकारको खर्च दायित्व पूर्ति गर्ने गरी राजस्व उठेन ।

दैनिक सवा दुई अर्ब रुपैयाँ राजस्व संकलन हुँदै आएकोमा लकडाउन अवधिमा दैनिक ५४ करोड रुपैयाँ मात्र राजस्व संकलन हुन थालेपछि सरकारलाई खर्च धान्न समस्या भएको थियो ।

सरकारले चैतको कर असार पहिलो सातासम्म कर दाखिला गरिसक्न करदातालाई आग्रह गरेको थियो । यद्यपि असार मसान्तमा बुझाउनुपर्ने करले सरकारको राजस्व केही बढ्ने भएपनि पुरानो भुक्तानी समेत दिनुपर्दा सरकारको खर्च दायित्व समेत वृद्धि भएको छ । यसले गर्दा सरकारलाई आम्दानी र खर्चको सन्तुलन मिलाउन कठिन परेको देखिन्छ ।

सरकारले अहिलेसम्म कुल वार्षिक लक्ष्यको ६६ प्रतिशत राजस्व उठाएको छ । यो अबधिमा कुल बजेटको झण्डै ६४ प्रतिशत खर्च भएको छ । जस्मा पुँजीगत खर्च ३५ दशमलब चार पाँच प्रतिशत र चालु खर्च ७७ दशमलब पाँच दुई प्रतिशत खर्च भएको छ।