वालिङ खेलमैदानको दुबो छुँदैनौ : सचिव खनाल

वालिङ खेलमैदानको दुबो छुँदैनौ : सचिव खनाल
सुशील सुवेदी
स्याङ्जा , पुस २५
‘हाम्रो गौरब हाम्रो शान , वालिङ महोत्सव हाम्रो पहिचान ’ भन्ने नारा देश विदेशमा ब्राण्ड बनेको छ । यहि नारा बोकेर यस वर्ष पनि आठौँ वालिङ महोत्सव संचालन हुँदै छ ।
वालिङ उद्योग वाणिज्य संघले आयोजन गर्ने यो महोत्सव प्रत्येक २ वर्षमा आउने स्याङ्जावासीको ठूलो चाड हो ।
संघले आठौँ संस्करणको १० दिने चाड यहि माघ १८ देखि २८ सम्म वालिङ खेल मैदानमा मनाउँदै छ ।
यही मैदानमा ९ औँ राष्ट्रिय महिला फूटबल प्रतियोगिता समेत संचालन गरिएको थियो । उक्त खेल संचालन गर्दा जिल्लाका विभिन्न स्थानीय तह र वालिङ नगरपालिकाको झण्डै ८० लाख रकम दुबो रोप्दा खर्च भएको छ ।
राज्यको सम्पती खर्च गरेर रोपीएको दुबो संरक्षण गर्नुपर्ने माग सहित आठौँ वालिङ महोत्सव अन्यत्र सार्नुपर्ने केही नगरवासीको माग थियो । आयोजक वालिङ उधोग वाणिज्य संघले भने महोत्सब अवधीभर दुबो नछुने गरी कार्यक्रम स्थल निर्माणको तयारी गरेको बताएको छ ।
‘हामीले दुबो छुँदैनौ बरु दुबोको अवस्था कस्तो छ भनेर प्रदर्शन गर्ने वातावरण मिलाउँछौ ,’ संघका सचिव तथा प्रचार संयोजक पिताम्बर खनालले बताए ।
अहिले महोत्सवको स्टेज , स्टल र प्रवेशद्धारको डिजाइन नैं फरक हुने गरी तयारी गरिएको खनालको भनाई छ ।
‘आठौँ वालिङ महोत्सवको स्टेज दक्षिण फर्काएर निर्माण हुँदैछ ,’खनालले भने ।

महोत्सवमा २५० स्टल रहनेछन् भने स्थानीयले ३० प्रतिशत छुट पाउने संघका अध्यक्ष चेतनारायण श्रेष्ठले बताए ।
‘हिसाब कितावलाई पारदर्शी बनाएर बढि रकम जोगाउने सोँचमा छौ झण्डै ५६ लाख जोगाउने हाम्रो लक्ष्य छ । ’ श्रेष्ठले भने,‘ जोगिएको रकमले व्यवसायीको हक हितमा मन छुने काम गर्नेछौँ ।’