मे.दृ संवाददाता
स्याङ्जा , भदाै ६
खेतबारी मै तरकारी कुहिने र बिचौलियाको मारमा परेका कृषकलाइ मध्यनजर गर्दै आँधिखोला गाउँपालिकाले खेतबारी बाट आलु खरिद गर्न थालेको छ । आधिँखोला १ भकिम्ले , दत्तेलटे त्रिवेणीका कृषकको बारीबाट आलु खरिद गर्दै बजार ग्यारेण्टी गर्न थालेपछी यहाँका किसान बाँझो जमिनको समेत सदुपयोग गर्दै आलु खेती तर्फ आकर्षित भएका छन् । सप्ताहव्यापी कार्यक्रम अन्तर्गत माटो परीक्षण गरेर यस श्रेत्रलाइ आलु पकेट क्षेत्र बनाउन पालिकाले निशुल्क बिउ बिजन, प्राबिधिक सहयोग र बजार ग्यारेण्टी गरेको थियो । अहिले यहाँको बाँझो जमिनमा ३३ घरधुरीले पहिलो चरणमा ३६०० केजी आलु उत्पादन गरेका थिए । गाउँपालिकाले कृषकको बारीमा नै गएर ३६०० केजी आलु खरिद गर्दै बजारको ग्यारेन्टी गरेको गाउँपालिका अध्यक्ष सुधिर कुमार पौडेलले बताए । उनले भने , ‘आवश्यक परामर्श ,निशुल्क बिउ बिजन हामि दिन्छाैँ , योजना बनाएर आनुहोस् ।’
भकिम्लेको आलु भनेर आज भन्दा २५ वर्ष अगाडी देखि यो ठाउँ परिचित भएपनी बसाइसराइको कारण बाँझो जमिनलाइ पुन उत्पादान सँग जोडिएको पौडेलले बताए । कृषि ज्ञान केन्द्रको सहयोग तथा आँधीखोला गाउँपालिकाको समन्वयमा दत्तेलोटेलाई आलुको पकेट क्षेत्र बनाउन यो अभियान सुरु गरिएको हो । कृषकले प्रति केजी ५५ रुपैँया प्राप्त गरेका छन् भने उपभोक्ताले पनि सहुलियत दरमा उपभोग गर्न पाएका छन् । यो कार्यले कृषि उत्पादन बिक्री नभएर खेत बारीमै कुहिने, बिचौलीयाहरुले कम मूल्य दिने जस्ता समस्याहरूको अन्त्य भएको गाउँपालिका अध्यक्ष सुधिर कुमार पौडेलले जानकारी दिए । ‘काम गरे राम्रो आम्दानी हुँदो रहेछ ’ ,कृषक दिपक पंगेनीले बताए । उनी भन्छन् , ‘कता गएर बेच्ने ? बिचौलियाले मुल्य कम दिए कि भन्ने चिन्ता हरायो । अब उत्पादन मात्र गरिन्छ । ’ गाउँपालिकाले संञ्चालन गरेको कृषी एम्बुलेन्स मार्फत उत्पादीत आलु उपभोक्ताको घरघरमा बिक्री गरिएको थियो । आँधिखोला गाउँपालिका र फेदीखोला गाउँपालिकाको संयुक्त लगानीमा निर्माण गरिएको कृषि उपज बिक्रि केन्द« मार्फत पनि यसको बजार व्यवस्थापन गरिने कृषिक प्राविधिक बिबेक आचार्यले बताए ।
