उद्धमी बन्दै युवा : आकर्षण फुटसलको

सुशील सुवेदी
वालिङ, २३ माघ ।

स्याङ्जामा नयाँ उद्धतर्फ युवाहरुको आकर्षण बढ्न थालेको छ । पछिल्लो समय कोरोना महामारीले रोजगारी गुमाएका युवाहरु आफनै व्यवसाय संचालन प्रति आकर्षित हुन थालेका हुन् ।

यसैको गतिलो उदहारण बनेका छन् वालिङ १० का ४ जना युवाहरु । सोमबहादुर मल्ल (बिमल), अन्दाज थकाली, बीरेन्द्रध्वज मल्ल र अनिशमान श्रेष्ठले सामुहिक एक करोडको लागानीमा फुटसल स्थापना गरेका हुन् । तल्लो वालिङमा सुविधा सम्पन्न कोर्ट स्थापना गर्दै वालिङ फुटसल संचालनमा आएसँगै फुटवलका पारखीले बन्द कोठा भित्र फुटवलको मनोरञ्जन लिन सक्नेछन् ।

शुक्रवार फुटसलको उद्धघाटन गर्दै वालिङ नगरपालिकाका नगरप्रमुख दिलीप प्रताप खाँणले खेलकुद श्रेत्रमा गरिएको खर्च खर्च नभई लगानी भएको बताए । उनले भने ,‘यो खर्च होईन लगानी हो । एउटा फुटसल निर्माणले हजारौँ नगरिकलाई स्वस्थ बनाउँछ । ५० शैयाको अस्पताल निर्माण गर्नुभन्दा हजारौँ मानिसलाई रोगबाट जोगाउन यो फुटसलले महत्वपूर्ण भूमिका खेल्छ । ’

वालिङमा फुटसल स्थापना भएसँगै फुटबल खेलमा नयाँ युवाहरुको आकर्षण बढ्ने एन्फा का केन्द्रीय सदस्य लालबहादुर ज्वारचनले बताए । फुटसल उद्घाटनका क्रममा खेल क्षेत्रमा महत्वपूर्ण योगदान दिने व्यक्तिहरुलाई सम्मान गरिएको थियो ।

विदेश तथा स्वदेशका ठुला शहरहरुमा फुटसल नौलो व्यवसाय नभएपनि स्याङ्जामा भने नौलो हो । यस अघि जिल्लाकै पहिलो फुटसल वालिङ स्पोर्टस सेन्टरले वालिङ ८ मा स्थापना गरेको थियो । ५ वर्ष कोरीया बसेर नेपाल फर्केका गणेश सुवेदीले करिव एक करोडको लागतमा फुटसल संचालनमा ल्याएका थिए । दैनिक ८—९ खेल खेलाउन सकिने बताउँदै सुवेदी भन्छन् , ‘विदेशको कमाई भन्दा स्वदेशकै परिश्रममा आनन्द आउँदो रहेछ । ’प्रति घण्टाको एक हजारमा एक समुहले खेल खेल्नसक्ने वालिङ स्पोर्टस सेन्टरका संचालक गणेश सुवेदीले बताए ।