कालिगण्डकीमा राष्ट्रपति रनिङ शिल्ड प्रतियोगिता

स्याङ्जाको कालिगण्डकी गाउँपालिकामा राष्ट्रपति रनिङ शिल्ड प्रतियोगिता २०८२ सुरु भएको छ ।
गाउँपालिकाको वडा नम्बर ७ मा रहेको मिर्मि खेलमैदानमा बुधबार राष्ट्रपति रनिङ शिल्ड अन्तरविद्यालय खेलकुद प्रतियोगिता सुरु भएको हो ।
प्रतियोगिता उद्घाटन समारोहमा गण्डकी प्रदेश स्याङ्जा क्षेत्र नम्बर २ प्रदेश ख का सांसद महेश भट्टराईले खेलकुदका माध्यमबाट विद्यार्थीहरुमा एकता र सद्भावको विकास हुने बताउनुभयो ।
फरक प्रसङ्गमा उहाँले देशको अहिलेको संकट समाधान गर्न सबै पक्ष एकजुट हुनुपर्ने बताउनुभयो ।
सांसद भट्टराईले राष्ट्रियताको संरक्षणका लागि एकता र मेलमिलापको विकल्प नभएकोमा जोड दिनुभयो ।
आवाज
कार्यक्रममा गाउँपालिका राष्ट्रिय महासंघका महासचिव तथा कालीगण्डकी गाउँपालिकाका अध्यक्ष खिमबहादुर थापाले कालीगण्डकी गाउँपालिकाका विद्यार्थी र खेलाडी राष्ट्रिय स्तरमा पुग्न सफल भएको बताउनुभयो
उहाँले अहिले देश अप्ठ्यारो घटनाबाट अगाडि बढेको भन्दै सबै राजनीतिक पार्टीले नै यसलाई ट्रयाकमा ल्याउनुपर्नेमा जोड दिनुभयो ।
अध्यक्ष थापाले जेनजीहरुले उठाएको मागलाई पुरा गर्दै देशी विदेशी शक्तिहरुको षडयन्त्र चिर्नुपर्ने र मुलुकलाई जोगाउन सबै पार्टीहरु एकजुट हुनुपर्ने अवस्था रहेको बताउनुभयो ।
कार्यक्रममा गण्डकी प्रदेशसभा सदस्य निर्मला थापा लगायत विभिन्न स्थानीय राजनीतिक दलका प्रमुख तथा प्रतिनिधिहरुको पनि उपस्थिति रहेको थियो ।
कार्यक्रममा आदर्श माविले राष्ट्रिय सेवा दलको कौषल प्रस्तुत गरेको थियो ।
कालीगण्डकी गाउँपालिकाको आयोजनमा भएको प्रतियोगितामा १६ वटा विद्यालयको उपस्थिति रहेकोमा १४ वटा विद्यालयले प्रतिस्पर्धा गरिरहेका छन् । जसमा ९८८ जना विद्यार्थी सहभागी भएको गाउँपालिकाका उपाध्यक्ष सावित्रा कोइरालाले जानकारी दिनुभयो ।
कार्यक्रमको संचालन गाउँपालिकाका प्रमुख प्रशासकीय अधिकृत परशुराम पोखरेलले गर्नुभएको थियो ।
सबै जसो स्थानीय तहले गर्ने राष्ट्रपति रनिङ शिल्ड प्रतियोगिता यस वर्ष स्याङ्जा जिल्लामा पहिलोपटक कालीगण्डकी गाउँपालिकाले सुरु गरेको हो ।
“सबैका लागि खेलकुद, स्वास्थ्यका लागि खेलकुद, राष्ट्रका लागि खेलकुद” भन्ने मूल नाराका साथ आयोजना गरिएको प्रतियोगितामा भलिबल, ट्रिपलजम्प, एथलेटिक्स (दौड), ज्याभलिन थ्रो, हाईजम्प, सटपुट, लङ्जम्प, कबड्डी र टेक्वान्दो लगायतका विभिन्न खेलहरू समावेश गरिएका छन् ।
खेलकुदमार्फत विद्यार्थीहरूमा आत्मविश्वास, नेतृत्व क्षमता र अनुशासन विकास हुने उद्देश्यका साथ यो प्रतियोगिता आयोजना गरिएको गाउँपालिकाले जनाएको छ । प्रतियोगिता विहीबार सकिनेछ ।